翠如向蕭正楠求婚餐具當婚戒
蕭正楠自爆與黃翠如於新西蘭註冊結婚，男方第一次求婚失敗，第二次則由翠如求婚，二人更以餐具弄成戒指，非常浪漫。阿蕭坦言沒有後悔「騎劫」台慶，更驚訝翠如突然變溫柔。
藝人蕭正楠前晚於無綫《萬千星輝頒獎典禮2018》上宣布，已與黃翠如結為夫婦，事後他接受訪問時稱，今年四、五月已於新西蘭旅行結婚。提到求婚經過，他自爆第一次求婚時失敗收場：「我同佢玩過山車時求婚，點知上到去佢好驚，我攞起隻戒指叫佢望，佢死都唔肯望，我又驚隻戒指跌喎，最後終止呢個行動。」又稱註冊前已知會父母，當時二人拿着結婚申請書，但排錯隊，去了判刑罰的法庭：「佢真係太可愛！我覺得今晚做得好啱，有個好好嘅回憶。其實事前翠如都唔知，但我真係忍唔住。（騎劫頒獎禮？）我都係講兩句啫。」
下世繼續一起
翠如於凌晨時分在社交網發文，坦言第二次求婚由她做主動：「我在河邊向他求婚，沒有衣香鬢影，沒有氣派場地，就連一對合尺寸的戒指也找不到，在一個鄉村小市集，找到一對用餐具弄出來的小戒指……這樣吧！那一刻，我們甚麼也沒有，但我們擁有了對方。」當時證婚人問他們為何選對方？她指每次跌倒，阿蕭都陪伴。阿蕭則留言指希望下一世繼續與她一起，相當浪漫。
阿蕭昨日拍攝劇集《黃金有罪》，他說：「尋晚係好好嘅時刻，好多女藝人都喊，原來我咁受歡迎，一直都唔知，尤其胡定欣攬住我喊，好開心。我當然最希望攬住我嗰個係翠如，但佢好早就飛車走咗。（翠如冇諗過你會公布？）佢有預感，但佢唔知我幾時講，有乜好過一次過喺全港朋友面前將呢件開心事分享？想畀太太難忘一晚。」又笑言未見過翠如此溫柔：「佢知我準備咗好耐，佢好感動，我停車嘅時候，佢已經企咗喺門口用好迷人嘅眼神望住我，不過瞓醒已經打回原形。」問到會否補擺喜酒？他坦言太太想低調。至於造人大計？他稱被不少工作人員催生B：「佢哋話條腰好緊要，講抱BB同幫BB沖涼好靠條腰，大家畀咗好多鼓勵我，順其自然，我哋兩個都鍾意小朋友。」
聞「蕭太」甜笑
另外，翠如昨午獨自駕車到荃灣車房補車胎，聽到記者稱呼她做「蕭太」即甜笑說：「唔好意思，有啲緊要嘢做咗先，辛苦你哋。」她向車房工作人員交代後，便進入隔籬的餐廳。約半小時後，她離開時禮貌表示：「辛苦晒。（幾時搬去新愛巢？）哈哈，多謝多謝。（補搞婚禮？）同佢傾吓先。（係咪趕生豬仔？）唔係，辛苦晒。」然後駕車返大埔寶馬山的娘家。