許志安自爆醉史驚見UFO
歌手許志安、郭富城、組合As One前成員蘇皓兒（Chloe）、內地女星劉雅瑟、陳凱歌及沈震軒前晚出席「第三屆澳門國際影展暨頒獎典禮」，安仔因患上感冒聲沙沙，他說：「前兩日出席長輩生日，席間合唱完就咁。」問到是否飲多兩杯所致？他否認：「我飲酒適可而止，差唔多夠就走人。（好耐冇飲醉？）好耐冇，因為我有個掣，好耐之前試過飲醉酒，好過分，指住盞燈話係UFO，但近十年八年有個掣。（老婆畀個掣你？）講呢啲，飲得酒多對身體都唔好，知道差唔多就停。」
全港集體回憶
談到工作，安仔忙於籌備明年演唱會及唱片，望與新人合作有突破。對於古天樂殺入樂壇頒獎禮，他笑言看好對方：「今年係佢，全香港都想睇佢開聲。（佢踢走陳奕迅打入十強。）唔好話踢走，大家都係好朋友，全香港都想睇一個回憶，我想聽佢唱《男朋友》，希望佢攞獎。（大家等睇好戲多過想佢攞獎？）佢係集體回憶，陳奕迅都好好，不過我都想聽新嘢，衝擊吓樂壇。（同古天樂合唱？）唱乜？佢同謝安琪合唱嗰首歌幾好聽，兩個男人一齊合唱唔知點，都係唱《當年情》嗰啲。」
同場的Chloe表示現以拍劇及電影為主，下星期會拍無綫劇，問到一頭短髮是否為新劇而剪？她說：「唔係，不過監製覺得我短髮都幾特別，所以搵我演出。」
【特派記者陳嘉敏澳門報道】