朱晨麗 伍允龍另類婚照鬥擘髀

朱晨麗、伍允龍於台慶劇中一拍即合,更於求婚場口大玩浪漫,為拍「潮爆婚照」兩人絞盡腦汁度動作,不但擘髀晒一字馬,更忍不住耍兩拳過招,簡直打出愛火!

無綫藝人朱晨麗(朱朱)、王浩信、楊明、伍允龍及江嘉敏等主演的台慶劇《兄弟》將進入尾聲,除了動作場口吸引外,幾對主角的感情線亦愈見突出,尤其朱朱與伍允龍呢一對!伍允龍在劇中放下硬漢形象大玩浪漫,向朱朱跪地求婚,二人於英國拍攝外景時,更在倫敦多個名勝景點包括倫敦塔橋等,拍婚照留念。

武功vs舞功

朱朱笑指這輯婚照非一般的與別不同:「好多動作甫士都係我哋自己創造,佢耍武功,我就晒舞功,佢有咁好嘅拍檔即係我,先至影得出咁嘅畫面!」雖然只是拍道具相,但二人一點也不馬虎,跳高「惡鬥」一字馬,大展活力與身手,打造出「潮爆婚照」。

歐洲搵靚景

而現實生活中暫未有計劃披嫁衣的朱朱,亦難掩憧憬的心,坦言:「我自己都有諗,第時係咪要去歐洲,搵啲最浪漫嘅地方影相。」至於劇中拍檔如王浩信及江嘉敏等,會否一樣如他們「修成正果」,朱朱笑答:「唔可以劇透喎,只可以話我哋應該係最Sweet嗰Pair,進展得比較快。」