朱晨麗詐晒型等何廣沛約撐枱腳

朱晨麗自認傳統，感情上鍾意男方主動。

台慶劇《兄弟》一班演員朱晨麗（朱朱）、王浩信、伍允龍及楊明等昨日為劇集宣傳，適逢朱朱31歲生日，劇組安排蛋糕慶生，最後卻演變成忌廉大戰，朱朱滿面忌廉慘成花面壽星，她笑說：「上次江嘉敏生日，我哋用蛋糕質佢，所以佢今次報仇。（點慶祝？）之後仲要開工。」問到有否異性相約？朱朱乘機投訴：「依家啲男仔要主動啲，點解咁被動

㗎！」至於緋聞男友何廣沛可有表示？她指對方有傳短訊祝福，問到算不算主動？她反問：「你覺得呢？（會唔會扣分？）你哋幫我扣分。（收唔收貨？）梗係唔得，佢要請我食飯。」

生日大晒！變花面貓的王浩信冇仇報！	朱晨麗被江嘉敏及陳庭欣用忌廉突襲。	劇中互有感應的伍允龍（左）與楊明，唔知打機係咪都有默契呢？

王浩信想冧莊視帝

另外，王浩信日前在社交網透露拍劇集《解決師》時尾指骨折受傷，他說：「嗰場戲係講我畀人綁架，雙手反綁，我連人帶櫈跌咗落地，所以就壓到隻手，好在唔算嚴重，依家仲係腫，但康復進度理想。」問到有否信心冧莊視帝，他坦言抱觀望態度：「我想攞，但都要睇觀眾。」同樣有份提名視帝的楊明，開玩笑指想成為最年輕的演藝大獎得主。至於伍允龍雖未獲提名，但他未有失望，並會支持兩位好兄弟。