蔡一傑扮近藤結為好友
歌手蔡一傑日前接受無綫節目《StarTalk》訪問，大談首次灌錄日文歌感受，他直言以往聽日文歌好癲：「讀書都冇咁叻！以前學唱日文歌，會用自己嘅拼音方法，有中文、英文同符號，得我自己識睇。由於80、90年代嘅日文歌影響我好深，所以唔會覺得太難學，依家我喺屋企睇書自學，會繼續加把勁。」
傑仔曾參加過模仿日本歌手近藤真彥大賽而奪得冠軍：「係新秀之前嘅事，比賽後我仲喺近藤面前表演過，之後因為阿梅（梅艷芳）再認識佢，我問佢記唔記得我，佢竟然話記得！之後我哋去街玩、唱卡拉OK同埋食飯，我又去日本支持佢開騷，我覺得好Amazing，大家竟然變咗朋友，如果有一日，我唱廣東版佢唱日文版就好啦！」
