毛舜筠瘋狂運動同老公多嘢玩
影后毛舜筠昨日偕陳曦齡、石詠莉、林奕匡等出席「維特健靈慈善單車馬拉松2019」記者招待會，毛舜筠表示因要負責打氣及頒獎，故明年2月比賽當日不會落場參賽，但坦言有段時間與老公區丁平瘋狂踩單車：「夜晚食完飯就會由沙田踩到去大埔，玩一輪之後就轉咗玩瑜伽、跳舞，之後我哋搬遠咗就玩行山。」問到可有與兩個女一起做運動？她說：「佢哋以前係懶，依家就變咗運動員咁成日去做Gym，嫌我哋濕濕碎。」一家人反而愛去旅行，聖誕節將去京都，回來她繼續拍戲及做曲奇餅、飲食生意：「拍戲方面簽咗英皇咁好嘅團隊，我都希望可以再做好啲。」
石詠莉表示近來因拍微電影而多做運動，老公鄧健泓亦認為她要多郁動。問到老公是否與她一齊郁？她說：「佢不嬲都好Fit，所以我唔可以畀佢得戚，成日炫耀肌肉。（想練到有肌肉？）想Firm啲啫，聽人講如果之前有鍛煉過，生仔會易啲。（為生仔做準備？）各樣啦，呢排做咗運動面色都好啲。」又說有睇中醫調理身體，準備好才生仔。
