開口𢱑聖誕禮物蔡思貝：有被愛感覺

重情重義的蔡思貝，至今仍難忘舊愛送的禮物。

蔡思貝昨日身穿低胸吊帶裙現身信德中心「光影聖誕狂想曲」揭幕禮，與觀眾互動大擺甫士，並製作霓虹燈。她坦言恨收聖誕禮物：「每年聖誕同生日，都諗會唔會收到啲特別禮物，因為好多時十份有九份唔啱心水，但如果收到一份禮物係令你雙眼發光，證明對方好了解你、好體貼同好錫你，令我有被愛感覺，唔一定係男友送，閨蜜都可以！」

收電子產品得啖笑

思貝坦言收過令她「雙眼發光」的禮物，她笑說：「以前男友送，係一個木盒，上面刻咗我個名同大家相處嘅時光，佢送畀我收藏紙條同郵票。」至於最不合心水的禮物，她透露是一個路由器（router）：「如果有需要我自己會買，佢送電子產品畀我，唔知點好，不過呢個成為我哋之間嘅玩笑，我問佢『你今次係咪送插頭畀我？』」

蔡思貝揮動星星棒，Fans即擺甫士配合，非常可愛！	謝東閔親自幫Fans裝身，提早感受聖誕氣氛。	蔡思貝與謝東閔聖誕各有各忙，但都不忘享受佳節。

拍動作戲當運動

提到聖誕節，思貝透露要在工作中度過，正趕拍新劇《機場特警》：「可能會喺機場過，我哋一班後生演員好Friend，大家氣氛好好，可能到時會開Party。（個個男演員都操得好Fit？）係，我都好有壓力，個個又除衫，我都想Fit啲。我都有拉吓橡筋繩、做掌上壓，而且劇中好多體能訓練，我哋賺咗，當做運動。裝備都重，要揸住長槍拍追逐戲，但又要Keep住好有型，唔可以跑到面無血色！」