王君馨有信心爆冷贏視后

藝人黃智賢、關禮傑、王君馨、麥明詩、林秀怡及王梓軒等，昨日到中環宣傳無綫劇《是咁的，法官閣下》，眾人在鬧市Busking及派禮物。君馨透露剛由紐約返港，早上五時半落機，但為煲劇而冇瞓覺。

黃智賢獲親友力撐

有份提名視后的她直言最想劇集奪「最佳劇集」獎：「愈睇愈寫實，講出香港人心聲，身邊人都話好有共鳴。（咁你提名視后呢？）好多人撐我爆冷，有呢啲鼓勵我覺得好大支持。」有傳她為衝刺事業而拒生B，她表示：「係希望過多一兩年先預備，我同老公年紀仲細，佢只係嚟咗香港年幾，仲習慣緊呢度嘅節奏，而且我想環遊世界先。（攞完視后先生B？）呢樣好睇天時地利，控制唔到，跟住都有套大劇要練功夫，希望畀到觀眾驚喜。」

林秀怡努力工作，儲錢結婚。

王梓軒（前排左起）、黃智賢與關禮傑等，在街頭高歌。

至於提名視帝的黃智賢亦希望《是》劇奪「最佳劇集」獎，問到會否為自己拉票？他說：「親戚朋友二話不說投咗票畀我，都希望支持我嘅朋友唔好得個講字。」最近投資醫學美容生意的他表示要兼顧拍劇，忙個不停，問到會否做「白老鼠」？他說：「會做啲溫和嘅療程，做藝人要保持最佳狀態。（依家賺到幾多桶金？）我都係入股半年，會計師未埋數，但似乎收入可觀。」

林秀怡唔鍾意車震

而林秀怡最近被揭與助理編導Kevin在車廂啜爆，她承認拍拖兩年，並指對方已升做導演。問到有否壓力？她說：「我冇乜，佢就有，始終唔適應幕前，佢覺得自己好樣衰，我就唔覺，我話我心目中佢係最靚仔。（幾時結婚？）希望三年後，大家努力，希望早日飛黃騰達儲夠錢結婚。（你哋鍾意車震？）唔係呀！冇啜爆，冇伸脷，係情到濃時錫一啖。」