軒仔拍特輯當宣傳筍過換獎
歌手張敬軒前晚在無綫《勁歌金曲優秀選第二回》，憑歌曲《百年樹木》和《潛水》獲獎，今年他明顯發力，視四台獎項為囊中物，更無懼有換獎之嫌，為無綫拍特輯。不過，軒仔竟說這個節目具紀念性，比攞獎更好！
張敬軒直指今年有好多新嘗試，包括幫無綫到廣州拍特輯《軒仔與他的產地》：「去咗廣州我出世住嘅地方拍攝，舊居已丟空咗，但見到鐵門同木門都冇變，仲去咗細個讀書地方，同埋嚟香港住嘅第一間屋同酒店，重回舊地係幾感觸。」可擔心被人聯想到拍特輯換獎？他坦言：「老實講，呢個節目好過攞獎，一嚟有紀念性，特輯一個鐘，你知要喺TVB賣一個鐘廣告要幾錢。（咪就係錫你囉？）咁又唔係嘅，我今年勤力，係勤工獎嚟。」有指他明年9月開騷，軒仔表示未知，或有機會在新光開一個有關鄧麗君的音樂會，但仍在構思中。
Cheronna獲解封
轉做歌手後、首次憑歌奪獎的田蕊妮笑言坐在台下時被吳業坤騷擾，坤坤笑言自己忘了三個字的歌詞，阿田緊張問：「係咩？」坤坤抵死答：「就係『我愛你』。」被整蠱的她大呼：「畀你激死呀！」至於5月時Super Girls成員Cheronna因幫ViuTV拍劇及節目，疑被無綫封殺，前晚她終現身電視城，並說：「好開心囉，希望Keep住喺度出現。」問到可會再拍劇？身旁的Yanny說：「希望我哋下次一齊拍TVB劇，都未試過。」
關楚耀驚嚇走女友
同場的關楚耀（Kelvin）憑與星夢歌手譚嘉儀合唱的《Lonely》獲獎，其他星夢歌手周柏豪、吳若希、胡鴻鈞、菊梓喬、鄭俊弘、謝文欣和戴祖儀等共有14.5首歌獲獎，成為大贏家。久未奪歌曲獎的Kelvin，因ig相片洩「蜜」被揭有空姐女友Joann，他說：「每次都想低調，只想認認真真，談一場轟烈戀愛。（你啲戀情仲唔夠轟烈？）係咪唱悲情歌太多呢，我都唔想做悲哀代言人，只係想正正經經談戀愛，希望今次唔好嚇走人啦！」