劉佩玥初爭視后：唔想太早攞
劉佩玥和胡鴻鈞昨日宣傳新劇，提到劇集未播已獲提名獎項，劉佩玥表示大家不用太在意這件事，等播出後可選擇投不投票。對於憑另一套劇首次爭視后，她更謂不想太早奪得！
藝人劉佩玥（Moon）、胡鴻鈞（Hubert）、朱智賢和黃美棋等昨日出席《救妻同學會》之「迎妻兵團」活動，他們分組玩遊戲，如猜枚、蒙眼試食等，過程搞笑。
寸拍檔好快老
提到新劇未播，他們已各自入圍「最受歡迎電視男、女角色」，Hubert說：「多謝公司鼓勵，今次好大滿足感，拍攝過程十幾個後生仔相處好融洽。」Moon亦說：「同青春劇好有緣分，差唔多年年暑假都有青春劇畀我參與。」Hubert即抵死寸她：「過多幾年你做唔到㗎喇。」Moon表示上年都有提名此獎：「一路播出大家可以留意，可以去選擇投唔投呢啲角色，唔使咁着重今日先開始播，但又有得提名，大家Enjoy套劇啦。」
對獎項可有信心？Hubert謂對《救》的所有獎項都會投票。提到Moon憑《跳躍生命線》入圍「最佳女主角」，她表示首次爭視后：「開心，但知道自己唔係最佳，有得提名已係最大獎勵，我仲有好多嘢要學習。（唔想咁早攞？）都係，呢個係鼓勵，公司畀咩角色我都會繼續努力。」
黃美棋催旺事業
同場的黃美棋獲男友鍾健威到場打氣，她表示相隔10多年再拍無綫劇集心情好緊張，希望大家睇得開心。講到有指她獲雲文子師傅指點事業，她說：「每年都會搵佢指點迷津，有同佢講我會拍劇，師傅擺咗個事業陣畀我，佢話我一定會拎到個好好嘅角色。」問到與男友睇樓，她說：「都叫埋師傅幫我哋睇邊區好啲，唔係打算即刻置業，但睇住先。（置業定築愛巢？）想各自置業先，畀爹哋媽咪住得舒服啲。」她又指沒這麼快結婚，現時以事業為重。