焗做「小三」楊淇撬劉雅麗牆腳
藝人楊淇和劉雅麗近日忙於綵排舞台劇，劇中劉雅麗要面對飾演「第三者」的楊淇，她稱現實中卻佩服這類人：「第三者係傷害自己，又傷害到其他人，呢個角色都唔易做。」
劉雅麗（Alice）和楊淇已不是第一次演舞台劇《香港式離婚》，但每次都有新啟發，Alice笑言初演時未到更年期，現在事隔多年再做同一角色，一個妒忌心極重的更年期女律師，她稱卻手到拿來：「因為自己開始接近更年期，有啲感受開始捉到！」
由於劇本的主題細膩，Alice和淇淇坦言從中對婚姻和兩性關係都有啟發，對婚姻仍很有幻想的淇淇，笑言未有男友但長期Ready拍拖，雖然演「第三者」，但直言現實中盡量不會做及不想遇上「第三者」。
嘆害己害人
而經歷13年拍拖最後都是分手收場的Alice，已單身8年，對愛情或婚姻，並不如淇淇般幻想，但亦不會抗拒，只是目前遇不上，可能未學懂去愛人，她說：「一段關係要分開，原來自己都唔識愛人，當中好多猜疑同唔信任，但又冇諗過要為對方做啲乜嘢！（對婚姻恐懼？）從來都冇結婚衝動，分開都冇恐懼嘅，順其自然啦！不過，聽朋友講完婚簽字的前後感覺係有不同，我都有啲好奇，如果再撞到啱嘅都會結。（有目標？）到我呢啲階段真係愈來愈難，但好彩我咁多年都工作好忙，有好多朋友陪，唔會悶！」
Alice劇中要面對「第三者」淇淇的出現，她說：「第三者係傷害自己，又傷害到其他人，不過，呢個角色都唔易做，畀世人鬧，佢哋都要承受好多問題，我都好佩服呢啲人！」
