何傲兒尋幽探秘做旅遊達人
藝人何傲兒最近進攻大陸市場，她忽發奇想，將香港旺中帶靜的一面介紹給網民，特別自資製作旅遊特輯，由拍攝放上網、搜集資料、主持、配音都一手包辦，向旅遊達人出發！
何傲兒（Lily）早前拍攝的電視劇《歸去來》大獲好評，近期則忙於自製旅遊網：「之前我喺內地拍電視劇，同啲工作人員傾開，發現佢哋對香港文化好有興趣，成日嚟香港，不過通常都係去購物區，其實香港有好多好靚、好值得去嘅景點。好多『隱世』嘅地方，好值得去探索，所以我拍咗啲旅遊片喺網上同大家分享，以我嘅角度去介紹香港。」
日月星街做文青
Lily眼中的好地方，是小時候愛去哪兒玩與吃，何處買「得意嘢」等等：「每集都會介紹唔同嘅地方，好似大澳嘅水村、棚屋，平時好少見到，但環境好靚。又好似灣仔日月星街，灣仔畀人感覺好嘈、節奏好快，但日月星街好特別、好靜，有好多特色店舖，有文青氣息！又例如去深水埗，我好細個鍾意食油渣麵、逛珠仔街。仲會有石澳、舊式中環、西營盤，我唔會介紹熱門地，盡量偏啲，都係好得意嘅地方。」
問到是否想做網紅或旅遊達人？她說：「如果做網紅要花更多時間，依家主力想以自己角度將小事件分享畀大家。（有冇諗過出旅遊書？）有機會都會試，今次搜集資料都好辛苦，因為我要對自己介紹過嘅嘢負責，一定要自己試過先，用最真實嘅自己去介紹！」
