張敬軒生得出姜濤隔代爭獎
張敬軒（軒仔）及G.E.M.（鄧紫棋）等一眾歌手昨日出席《新城勁爆頒獎禮2018》記者會，二人先拔頭籌獲大會頒發獎項。軒仔笑言要隔代跟新血爭獎，更自爆被粉絲取笑生得出相差18歲的新人姜濤！
37歲的軒仔憑《天才兒童1985》獲頒「勁爆播放指數歌曲」，他坦言今次得獎對幕後團隊有所交代，又表示會出席四大頒獎禮：「戰衣搞掂晒啦，如果有多啲獎就換多啲衫。每個（頒獎禮）兩套啦，有得揀吓。我都想豐收，不過好多新血，我要隔代爭獎，Fans話我已經生得出姜濤！」對於被騙徒冒認並透過交友及私訊等途徑疑詐騙金錢，他指騙徒竟找到其教會的教友，幸而暫時無人被騙！
11月大旺要買六合彩
獲頒「勁爆國語力歌手」的G.E.M.表示11月鴻運當頭，除了早前到NASA唱中文歌，又入選英國廣播公司（BBC）年度百大女性：「攞埋呢個獎，我覺得要去買六合彩。（點慶祝？）冇呀，不過呢排飛得多好攰，食好多嘢都冇肥過！」至於男友Mark則沒有任何表示，她說：「反而我前一日為佢準備生日禮物，撳電話時好蠢咁畀佢睇到，於是我買過份好核突嘅畀佢，佢收到就好失望，話我品味差，話咗成日！」她笑言忍笑了12小時，才送上真正的驚喜，不過男友禁止她說出來，估計他或會在社交平台公開。
欣宜自認懶化妝
而鄭欣宜談到日前素顏出街仍願意跟女途人合照，被讚友善，她直言當時有簡單畫眉及遮黑眼圈，問到會否改化濃妝？她說：「我經理人聽到會好開心，因為我好懶化妝，都應該打扮吓，整對眼睫毛，個樣精神啲。」她指除非剛做完Gym，其他時間樂意合照，但不要在她張口吃飯時偷拍。
