王浩信搶Fo勝在夠粗！

藝員王浩信、楊明、伍允龍、劉穎鏇、江嘉敏、陳庭欣及李松蔓等，昨日齊齊換上拳擊裝束到健身室為台慶劇《兄弟》造勢，雖然眾女出盡力晒腿，但都不敵李松蔓晒4吋驕人事業線吸睛，噴血指數爆燈！

席間男女子分組玩遊戲，主持出題要求符合「最粗」條件的演員上前，女子組誤以為鬥「辮」粗就推阮兒應戰，主持即語帶雙關講黃色笑話，原來是同男子組代表王浩信鬥手臂粗，女子組見勢色不對，加碼叫江嘉敏出手一齊度，但仍以半吋之差輸給16.5吋粗手臂的王浩信；第二回合「鬥長」，劉穎鏇與楊明互度腳長時，俯身晒線頭同樣吸睛，以44.5吋腳長打倒楊明；終極回合「鬥闊」，李松蔓輕鬆以一字馬秒速K.O面容扭曲的伍允龍，場面爆笑！

為豬屍解畫

及後，劉穎鏇受訪為劇中打豬屍一事解畫，坦言當初知道劇情時也有點質疑，有問工作人員是否有必要出動豬屍：「佢哋話以前都係用豬屍做沙包，所以就照拍，睇吓喺其他位做番好啲，冇再特別諗。」她預告稍後劇情會交代因爸爸是豬肉佬，要求自己打鬆100隻豬屍肉，故符合劇情，並強調拍攝時都覺不舒服：「有一幕我要孭起隻豬，雖然有毛巾墊住，但都覺得好尷尬。」講到劇中打拳致頭破血流，她坦言是真打，又開心稱有同父母一齊收看，笑指雖然媽媽睇到好心痛、肉赤，但有讚其表現。

王浩信	李松蔓鬥闊時兩腳一伸，完勝面容扭曲的伍允龍。	楊明「自暴其短」，唔夠劉穎鏇腳長。

等角色爆出

王浩信直言劇集播出後收到不同評價，曾於IG上作「回應」答謝觀眾支持，並指有進步空間，又透露之後的劇情會更緊湊。講到袁偉豪成星馬雙料視帝，問他可有信心爭視帝？他先恭喜對方獲獎，並指今年暫時得一套作品，待角色爆出才衡量獎項：「睇多幾個星期嘅觀眾反應先，最想拎係《最佳劇集》。」