孫耀威鼓勵老婆露多啲
孫耀威（Eric）將於本周五在九展舉行一連兩場《孫耀威演唱會2018》，個唱主題為「Hysteric（歇斯底里）」，他自爆私下好激、好癲：「我玩同做嘢都去到好盡。（有冇嚇親老婆陳美詩？）其實唔止佢，身邊嘅人都好難適應，但佢要同我一齊就要接受我。（佢有冇畀你同化？）都有，例如佢着咗啲性感衫，我話一係唔露，一係就露多啲，佢依家就會畀我搞到有呢個心態，有時去熱帶地方旅行，佢可以真空上陣涼浸浸。」
播「鬼聲」催上床
為了籌備個唱及新碟，他坦言24小時不夠用，老婆亦有詐型：「半夜我未瞓，佢每隔一個鐘問我瞓未，後尾佢好變態，喺屋企播啲類似粵語殘片好哀怨嘅歌，搞到鬼叫咁叫我上床瞓覺。」又預告個唱會有一part冧爆情歌送給老婆：「將多年嚟最冧嘅情歌全部連埋一齊，我跑步聽歌詞時都會冧到心心眼。」
陳美詩變「分飛燕」
另外，陳美詩昨日穿低胸裝出席活動，笑稱改名叫「阿燕」：「我呢排忙住分飛，變咗『分飛燕』。」談到Eric為個唱減逾20磅，身形Fit爆，她即讚老公性感：「見到佢手臂、胸肌、腹肌嘅線條出晒嚟，我忍唔住同佢講，要佢之後都Keep住呢個身形。」
髮型：Lobo @ Hair Corner
化妝：Samuel @江中平化妝室
場地：糖街CEO