泳兒搵機會取笑男友
藝人泳兒、張文慈昨日在九展出席活動，泳兒透露其髮型師男友Ziv亦應邀示範新髮型，在台下支持男友的她說：「佢平時少面對鏡頭，知道佢緊張，平日我有啲蝦碌佢就會笑我，試過去登台因為唔夠瞓，唱歌有一粒音『跣胎』佢都笑我，我今日就睇吓佢點樣喺台上發熱發光，哈哈。」
張文慈在劇集《解決師》中飾演警官，有不少長對白，令她突然生了不少白頭髮，她自嘲：「我唔用腦，人又樂觀，個樣咪後生啲、細個啲。」此外，她在劇集《跳躍生命線》的演出受到讚賞，表示剛接得通知在台慶頒獎禮可能有提名，大為開心，但不敢諗爭獎。