蔣怡抱仔姿勢差腰頸痛盆骨歪
榮升兩子女之母的名模蔣怡，近月爆發周身痛症，令她不能入睡，要看中醫調理。她指老公翁狄森近年迷上研究養生，經常化身「醫師」在家中督促她保養身體，日日提老婆要着襪免寒！
現年41歲的蔣怡5月時誕下細仔翁羽，與大女翁容湊成一個「好」字，自從細仔出世後，蔣怡變了戀子狂，開口埋口都讚兒子好得意，她日前在影樓拍廣告時說：「BB真係太得意，得意到基本上由一個人手傳到第二個人手，傳來傳去，冇機會放低，瞓覺時仲多人圍住佢，等佢醒又爭住抱佢。佢乖到唔會無喇喇喊，屋企開Party好嘈又冇嘢，聽講第二個BB自知會冇乜人理，所以天生乖啲，唔會煩到人，原來係真。」
惹大女投訴！
大女也很錫弟弟，但笑言女兒經常被人問有沒有照顧弟弟、錫唔錫弟弟，有日終忍不住向媽咪投訴話答到好攰，令蔣怡啼笑皆非。不過自從小兒子出世，她換來周身痛症，最致命是抱住餵人奶經常維持不良姿勢，令腰頸痛症加劇，看中醫後竟獲悉腰骨、頸椎、胸骨和盆骨全歪：「依家試緊古法紮肚，嗰度有中醫睇，醫師話我全身骨頭亂晒龍，淋巴都塞晒，我未試過通淋巴，原來好痛，醫師話我塞得好緊要。」
盼24吋腰返嚟
身為名模的她自言愈生愈大隻，未婚時加細碼，生大女後變細碼，生完細仔後變中碼，她直言不介意肥瘦，最介意是屋企所有衫褲都穿不下，自認慳家不捨得買新衫，故希望回復細碼24吋腰，現距離目標還有兩吋。
蔣怡又透露珠寶設計師老公翁狄森近年愛鑽研養生，經常看書研究，在家叩打身體通經絡，日日提老婆要着襪免寒，問她會否讓老公叩打？她笑言：「好驚，我唔畀佢打，我平時唔着襪，佢一見我唔着就搵對襪畀我，我覺得中醫嗰套係有用，呢幾年佢身體好咗，以前佢身體差過我！」