吳若希高瘦平冇峰險
歌手吳若希（Jinny）和菊梓喬（Hana）昨日現身將軍澳新都城中心，即場炮製愛心早餐給粉絲品嘗，穿性感吊帶裙的Jinny頻頻俯身，但依然力保不失！提到成功守住「防線」，她自嘲早年與許紹雄合作，獲對方起花名「高瘦平」，故自爆雖只戴了Nude Bra兼沒有黐膠紙，但也不怕走光。相對密實的Hana卻自爆有黐膠紙，笑指裙子只有單邊肩帶，怕會從另一邊「失守」。
「老公仲生勾勾」
兩女因亮相節目《美女廚房》而被封「地獄廚神」，穩守倒數第一及第二名。問Jinny平時有否下廚？她笑說：「我前日先煮早餐畀我老公，但佢冇食到話趕時間返工，我煮咗奄列，覺得賣相OK。（試過你手勢？）有，但佢好溫柔咁同我講『你不如唱番歌啦，我鍾意你唱歌多啲。』聽完覺得好Warm，起碼老公依家仲生勾勾。」
Hana則笑言是節目效果，事實上她會煮家常菜式：「起碼唔生，食咗唔屙先。」更表示曾煮早餐及晚餐給舊男友，對方直言感覺幸福。會否繼續學廚做人妻？Hana表示見步行步，打破「Dry缽」：「想做女朋友先，希望搵到人陪過聖誕。」
