王浩信硬食過百巴江嘉敏摑到驚！
藝人王浩信在新劇中被江嘉敏狂摑過百巴，有豐富被摑經驗的浩信出招自摑做示範，用心良苦！而「兇手」江嘉敏則揚言打到手痛，希望浩信不要嬲她。
王浩信、江嘉敏、朱晨麗及劉穎鏇等，昨日宣傳無綫台慶劇《兄弟》，因先後在劇集被劉松仁及謝雪心打而被封「兜巴信」的他，今次「經典」再現，被江嘉敏連摑逾百巴！浩信明白出手的人比捱打者更驚慌，故為了盡快完成，特別親身示範：「劇入面話我昏迷咗，江嘉敏要摑醒我，好彩冇畀佢摑暈啫！（最甘今次？）應該係劉松仁嗰次，佢本身識氣功，都叫做收咗手，嗰幕都有畀網民整成gif圖，算係對網絡世界有貢獻，希望呢套劇出街，都會多啲Cap圖畀網民玩啦！」問到可有信心冧莊視帝？他坦言未敢多想，只寄望該劇能捧走「最佳劇集」，至於會否為自己拉票，他說：「自己拉票有啲尷尬。（叫個女喺學校呼籲？）等我同佢講聲。」
伍允龍（目及）實朱晨麗
而江嘉敏則表示劇中唯一的「動作戲」就是掌摑浩信，一Take要摑三、四十巴，最終三Take才完成：「打咗佢百幾巴，每次都係真打，開頭都有就住，但浩信話出啲力先逼真，所以打到佢塊面紅晒，連我隻手都打到痛，真係唔好意思，希望佢唔好嬲我啦！」談到剛於台灣過生日，她甜絲絲表示男友有飛往當地慶祝：「佢整咗個蛋糕畀我。（好冧？）好開心囉！不過我哋冇二人世界，都係同劇組一齊過。」
至於穿西裝褸真空性感亮相的朱晨麗，透露劇中做打女之餘又要揸槍，幸好有拍檔伍允龍「加持」（目及）實，令她零受傷順利完成，更笑指對方犧牲瞓覺時間也要「監場」。