楊埕棄篋衝閘越洋搵救兵
有「翻版張栢芝」之稱的藝人楊埕日前準備坐飛機時，因太遲寄艙導致「人篋分離」，急急發動網絡威力後，最後獲一位素未謀面的「Superman」相助，行李才回到身邊。
有份參演劇集《再創世紀》的楊埕（Sabrina）表現出色，帶挈最近經常中、港兩邊走工作，日前忙裏偷閒飛到日本大阪小休數日，主要參與當地的美容展，順道飲飲食食，但未出發先驚嚇，經歷「人篋分離」，她說：「我一早喺網上Check In，諗住遲少少先到機場，點知航空公司職員話起飛前45分鐘唔夠時間搞，拒絕幫我寄艙，仲叫我買下一班機，但即場買張機票要萬幾蚊！同個職員糾纏咗十幾分鐘，得番半個鐘，我惟有將個篋捨棄喺閘口，跑入閘登機，最後個篋畀人送咗去保安室。」
人肉速遞 行李重回身邊
Sabrina即時發動社交網絡威力，尋找將會飛大阪的朋友，最後獲一位素未謀面的朋友幫助，令她感激不已，更以「Superman」形容對方：「我同佢有共同朋友，但係未見過面，佢唔知我個行李裏面有啲咩，都願意幫我去保安室攞番，真係憑住一個『信』字！佢好勇敢，係我嘅Superman！」
最後，Sabrina順利在日本交收：「見到佢嘅真面目好開心，佢認識埋我啲朋友，呢個Trip大家熟咗。」又自嘲幸好身形夠高大，能穿男性友人的服裝：「冇衫換又冇用開嘅化妝品同護膚品，真係好辛苦！女仔去旅行最緊要靚靚，出街影靚相。」笑言見過鬼怕黑，以後會預鬆時間到機場。
