張曦雯飛撲送禮向Lee Pace抄牌
邵氏網劇《飛虎之雷霆極戰》除了有黃宗澤（Bosco）及苗僑偉等擔演外，荷里活型男Lee Pace昨午亦現身中環碼頭投入拍攝工作，與工作人員雞啄唔斷，更與女主角之一的張曦雯（Kelly）甚有「交流」！他完成戲份登車離開時，Kelly手持大紙袋趨前送禮，還探頭入車廂與Lee及其助手閒聊，見她還拿出手機，似乎成功「抄牌」！
Kelly埋位前受訪，對Lee讚不絕口：「同佢去打邊爐，估唔到佢樣樣都食，豬紅同豬腸都話要試！」演特工的她與「上司」Lee不乏對手戲，而Bosco亦激讚這位型男：「佢份人好Nice、幾得意，之前大家已經介紹咗認識，相信今次合作會好愉快。」
另外，Kelly與Bosco首結戲緣已有感情線，但暫時親熱戲欠奉，Bosco笑說：「遲啲就未知！今日都有個擁抱嘅，幾十歲人仲學人兩小無猜，我驚佢啲粉絲呷醋。今次我係最多打戲嘅一個，但已經較上輯拍得輕鬆。（同Kelly一齊打？）佢只係負責化身OL『色誘』人咋！」