胡定欣笑認不和唔想見陳煒

《2019無綫節目巡禮》昨晚在將軍澳電視城舉行，將來年的劇集節目向現場客戶大晒冷。胡定欣最近因視后之爭傳與《宮心計2深宮計》拍檔陳煒不和，昨日又與舊愛陳展鵬同場，是展鵬婚後二人首次同場，自然成為焦點人物！

有傳定欣日前與多位藝員到星馬宣傳拉大隊杯葛陳煒，二人只有一張合照。現場二人孖住受訪闢謠，定欣講笑認不和：「我特登o架！我冇去新加坡，煒哥就冇去馬來西亞，係最後一日先喺怡保同場，因為唔想見到大家呀！」問到會否因傳聞影響感情？陳煒說：「得啖笑，可以第一日話我哋糖黐豆，第二日水溝油，第三日就話我哋互相毆鬥o架喇！」定欣亦表示沒有影響感情，問她是否很想再奪視后？她說：「新聞寫啫！我好支持煒哥，每年呢個時候都有呢啲新聞。（覺得炒熱個頒獎禮？）都係，套劇5月播，依家攤凍咗，有呢啲新聞畀大家溫故知新。（你拎過兩次，讓吓陳煒？）唔使我讓，佢有足夠能力同條件拎。」

單文柔話有Say Hi

對於跟陳展鵬冇交流，定欣沒好氣地說：「呢個都唔係問題，我唔識答，我有見到佢，好似同事咁打招呼，之前都恭喜咗佢結婚。」至於陳展鵬夫婦一同受訪，他說：「現場咁多人，（同定欣）有傾偈，咁我同譚俊彥都冇交流啦！」單文柔亦表示定欣於後台有跟她Say Hi。問到新婚生活，展鵬表示跟婚前分別不大，感覺仍像男女朋友，問是否婚後減產？他說：「好劇本要等，我都一年冇拍劇，係時候拍番，等緊文偉鴻搞好《唐人街》個劇本，同功夫有關，我都要練體能。」

王浩信企中間凸顯一線小生地位，胡定欣、陳展鵬及單文柔則排得相當有距離。	馬國明攬實黃心穎受訪。	胡定欣與陳展鵬的企位「這麼近、那麼遠」。

馬國明陪舊愛 心穎冇眼睇

活動上，馬國明被安排與舊愛定欣一同出場，問女友黃心穎可會呷醋，她笑說：「我冇睇到喎！頭先後台幾混亂。」馬國明攬實女友受訪時說：「公司安排啫！」心穎即笑說：「好似你個樣尷尬啲喎！」

每年大合照都顯示小生花旦地位，上屆視帝王浩信企正中間，隔籬是胡定欣、馬國明、黃智雯、袁偉豪，另一邊是唐詩詠、陳展鵬、田蕊妮、郭晉安。對此，浩信說：「可能我同詩詠嚟緊有劇出，做好每次機會啦！唔係擺邊度都冇用。（有信心冧莊視帝？）劇集未播，到時再睇觀眾反應！」另外，現場客戶有機會跟藝員合照，最受歡迎的是馬國明、定欣及浩信。