翁嘉穗爆大仔攻商雙「重」發展
前港姐冠軍翁嘉穗（Virginia）、名模Amanda S.、周汶錡和前日本球星中田英壽等前晚出席活動，有仔萬事足的Virginia大爆3歲細仔鄔謨風（Kasper）的校園趣事：「最近Halloween，本來準備咗套小王子衫畀佢，套衫已經唔係太Fancy（花俏），但佢點都唔肯着，搞到我都冇晒辦法！」
講到大仔鄔謨雲（Jason）早前在美國參加舉重比賽，勇奪世界賽冠軍，並打破兩項深蹲和硬舉的世界紀錄，Virginia透露Jason已到美國讀大學修讀商科，被問到會否因學業而放棄舉重訓練？她說：「佢好叻仔，分配到時間。（陪佢訓練？）佢自己搞得掂，所以唔會啦！」
周汶錡大仔斯文
同場的Amanda S.一身火紅低胸晚裝惹火亮相，與好友中田英壽敍舊：「我哋識咗10幾年，係好好嘅朋友，佢份人好好，我哋一直都有Keep in touch。」至於周汶錡（Kathy）透露大仔Jacques和細仔Avner都開始上學，Avner好動喜歡游水，反而Jacques比較斯文，還未融入校園生活：「Jacques讀全廣東話學校，未係好同到同學仔溝通，但佢嘅廣東話進步咗好多，識講多咗好多嘢，仲識唱唔少學校嘅中文歌。」
