陳瀅浸污水過敏生粒粒
藝人陳瀅（Jeannie）、劉佩玥（Moon）、馬德鐘、何廣沛及謝雪心等一眾《跳躍生命線》演員，昨日到荃灣出席慈善步行活動。Jeannie頸後生粒粒，她透露日前為劇集《廉政行動2019》拍攝一場落水戲，疑接觸污水後過敏：「因為近船同碼頭，水面見到油漬、膠樽同垃圾，搞到皮膚敏感，夜晚瞓醒覺得好痕，起身就去睇醫生。」她慶幸臉部沒受波及，問到可有繼續滑水？她說：「唔滑住喇，雖然去滑水唔近岸，水都乾淨啲，但驚咗！」Moon得知好姊妹皮膚過敏，即時八卦一下，她說：「有拉開衫睇，好彩唔係成個背脊都係，加上塊面冇事，真係不幸中嘅大幸！」
同場的馬德鐘已擔任大使多年，認為活動宗旨與劇集訊息相似：「好多時人做嘢未知有幾多收穫，做善事都係，希望可以種善因得善果。（感染埋囝囝一齊做善事？）會，呢啲要帶畀下一代，傳遞多啲正面訊息。」
另外，何廣沛在《跳》劇與羅天宇的催淚「兄弟情」獲盛讚，他感激觀眾熱烈支持，問到打算如何「找數」？廣沛說：「應該會請食飯嘅，成班兄弟當初剷晒頭去拍戲，都幾辛苦，好想同大家食番餐。（你背脊燒傷嘅化妝都唔簡單！）係，最慘係落妝時要一忽忽咁撕落嚟，起碼要1個鐘頭，過程好痛，我本身有皮膚病易敏感。」
