黎明父女兵上陣送禮講緣分

天王黎明前晚在澳門金光綜藝館舉行演唱會，繼早前在東莞騷首度開腔談及女兒，前晚他透過大銀幕，將女兒化身成「明福囡」，他在台上說：「呢個係幫我畫明福俠嘅朋友畫出嚟，佢冇見過我個女，係佢想像出嚟，幫我個女加咗頭盔，個女旁邊嘅公仔係冇名嘅，只得四條頭髮，可以叫佢做四髮。」他更將一批印有「明福囡」肖像的小手帕放在部分觀眾座椅下作幸運禮物，又不忘發揮金句王本色說：「送嘢畀大家，你估係咪每一個人都送晒？點會送晒？呢個世界每一個人，都要順序跟住個緣分，冇話係咪公平，係緣分，等於我都冇可能叫所有人唔憎我。」

「畀老黎搞到黐線」

在後台換衫時，大會播放有趣短片，有名雙眼被打格的員工「阿強」出鏡話要爆黎老闆內幕，包括老闆在男廁為他唱生日歌：「我就嚟畀老黎搞到黐線，我冒死接受呢個訪問！」他續爆有日獲老闆送上午餐：「我話係Show me your love飯喎！」老闆聽到他將粟米肉粒飯改名後大讚有創意，並買足五日，搞到阿強食到怕！

耳機突然失靈

當黎明獻唱金曲《相逢在雨中》時，兩度走落台握手。期間亦發生小插曲，他佩戴的耳機未知是否被汗水「入侵」致失靈，令他不斷聽到重疊聲響，一度追不上音樂，難得他處變不驚，更換耳機後繼續演出，還輕鬆在台上飲自備的羅漢果水。