網上賣飛冧檔何韻詩「玩自己」

歌手何韻詩將於12月21至26日在科學園舉行音樂會及市集，昨日粉絲優先訂票，因網絡問題一度停售！她在個人社交網致歉，受訪時又解釋網站程序出現問題，要重新製作網頁，惟與購票網溝通了兩個多小時，仍未知原因：「通常賣飛我都會睇住個市，知道大家買飛好辛苦。（太多粉絲買？）唔知，我擔心有啲人嘅電郵畀人Hack咗。」笑言有少少玩到自己，不過沒辦法：「大家對黃牛炒賣好氣憤，呢個行實名制方法係防黃牛，希望真係自己人買到。」屆時觀眾入場前要抽樣核對基本資料。而門票將於本月30日於網上公開發售，每人限購4張。