郭晉安理智與感性游走忠奸道
孭住三屆視帝銜頭的郭晉安，做慣好人，今次卻來個人生大逆轉，瞓身演奸角。戲內名成利就，戲外卻路途崎嶇，曾事業不順陷經濟低潮，不過採「穩守突擊」策略的他，懂得從逆境中累積經驗。雖然痛錫一雙兒女，但安仔斷言不會為他們鋪路，深信親自體驗的人生才是最精彩。
積尼尼遜衰得可愛
安仔的演技不容置疑，「阿旺」形象固然深入民心，19年前拍攝的經典劇《創世紀》，他飾演性格耿直的馬志強，更成就了一代劇迷的集體回憶。今次無綫開拍《再創世紀》物是人非，留低的就只有安仔，「由忠變奸」的他被睇高一線，有網民指他笑容令人心寒，且「連魚尾紋都是戲」﹗
演技好壞評價，或者收視高低，可以是觀眾主觀情感，演員的責任，就是要把本份做好。今回捲土重來，獲派扮演外熱內冷兼滿肚密圈的賀天生，安仔絕不輕敵，更做足準備功夫：「點樣演繹其實事先有同『太太』楊怡討論過嘅。我本身好鍾意積尼高遜喺荷里活電影《蝙蝠俠》內扮演嘅小丑，佢做衰嘢但又唔覺佢討厭喎，軟皮蛇搞到大家奈佢唔何，反而覺得佢可愛，所以我參考嚟做藍本。」安仔笑言自己的「奸」，可能會引起現今不少年輕人的共鳴與支持：「問心講，呢個社會邊個夠膽話自己完全冇諗過走捷徑、攞着數吖？只係大家唔敢做，而我就去做咗好多平常人好想做、但唔會去做嘅事。」
人生如戲冇得重演
由馬志強走到賀天生，名副其實的戲如人生。直接問他倘若有機會重演馬志強的話，是否有信心「再完勝」一次？好戲之人原來亦會有難處！他說：「我一定做唔番19年前嘅嘢嘞，呢19年嚟『郭晉安』本身都經歷咗好多，好似結婚、做爸爸、事業低潮、坐冷板櫈及經濟陷入危機等。以前嘅我係感性上分析理性，參透人哋想要啲乜嘢（演技），依家係理性上分析點樣感性啲，已經唔同咗。諗番轉頭，當年我遇挫折重返無綫，能夠即刻獲派演馬志強，男主角喎，真係好感恩。」
子女經歷自由發揮
性格決定命運，命運由自己掌握。對於星途較之其他同輩走多了不少冤枉路，安仔卻無怨無悔：「本來入行都只係當打份工，本身性格又唔鍾意應酬同搞關係，梗係冇咁順利啦，不過當中（兜轉）得到嘅經驗，係用錢買唔到嘅。（第二時將自己嘅社會經驗分享給仔女？）應該咁講，我想佢哋跌跌撞撞，會放手畀佢哋自己去體會人生，即使兜大圈亦未嘗唔係好事。」
買股損手寧要磚頭
今次戲內扮演一個金融狙擊手，跟現實生活中的安仔有頗大落差，安仔更自爆試過變身「大閘蟹」，辛苦儲下的積蓄瞬間化為烏有：「當時冇諗過幾秒鐘會損失咁多嘅，但問心都算好彩，因為股票有樣嘢好得意，就係一日唔賣出離場，一日都未埋單計算輸贏。我買嘅係大藍籌，咪當擺喺度儲錢收息囉，後嚟等咗好多年終於平手嘞，我就即刻放晒出去，自此之後我冇再掂呢方面嘅投資，依家有錢都會買磚頭。」
服裝：@Clot by juice_hk
場地：8度海逸酒店