王浩信殺手變教師攞正牌放肆
藝人王浩信、唐詩詠與莊思敏日前為無綫新劇在京士柏運動場拍外景，拍攝三人成功帶領學生贏得欖球比賽，浩信激動得與詩詠相擁，他直言為了角色要時肥時瘦，之前晚晚消夜，現在為減磅冇啖好食！
王浩信在劇集《解決師》中的角色先是殺手，後轉換身份為學校教師教欖球，所以他除了要學習欖球外，為了角色，身形上還要時肥時瘦：「我個角色有兩個階段，之前嘅階段做殺手時，受過軍訓，所以要操得結實啲，身形要鋼條啲，但後來做咗老師就會發福少少，為咗咁，有段時間我晚晚食消夜，食啲好多年冇食嘅嘢，都係一種福氣。」
「運動健將」唔想郁
增肥期間他直言少玩社交網站，因為覺得塊面大似Pizza：「最重嘅時候有81公斤，依家要開始減磅，因為之後會去澳洲拍番我做殺手嘅戲，依家已經減到76公斤，仲要減多兩公斤左右，希望做到個對比。」
詩詠表示新劇有一半劇情跟欖球有關，慶幸自己不用落場比賽，只需站在一旁打氣，並自爆求學時期是運動健將：「小學我係羽毛球校隊，中學玩長跑，我第一次拍劇嘅角色係打欖球，所以知道打欖球好辛苦，需要好多體力，記得有幕要落住雨比賽，最後全身都係泥。（想唔想拍部劇係做運動員﹖）唔想，呢啲細個拍，我依家企喺隔籬就得。」
莊思敏變「罰地魔」
在劇中飾演副校長的莊思敏被稱為「罰地魔」，她笑言：「因為我經常罰學生拖地，今次以學校景為主，都拍得好舒服，勾起唔少讀書回憶。」