65歲阿B鹿尾羓養聲「蕉」氣勃勃
歌手鍾鎮濤（阿B）等了十年終於再踏紅館舞台開騷，蓄勢待發的他曾言「副偈仲好得」，原來全靠太太范姜在背後「做手腳」，搞到他每朝都「好高興」，有氣有力迎接這次視作最後一次的演唱會。
鍾鎮濤早前接受專訪，形容今次演唱會準備了十年，因期間申請多次都落空：「如果今次唔開，可能呢世都唔會開！仲等十年嘅話，年紀都唔細，做就做喇。」為谷起最佳狀態，首要養靚把聲，阿B大爆太太落足料：「真唔知Fan Fan（范姜）喺邊度搵到養聲秘方，唔知係咪養錯咗地方，跌咗落『下面』。（係咪虎鞭、鹿鞭啊？）我都唔知屋企有啲咁嘅嘢，應該係人哋去啲東北地方後，送咗啲鹿尾羓畀我，其實唔使補到咁行。（係咪有用先？）朝早係有反應o架！好高興吓！（咪好囉！追多個！）唔會啩！費事一早起身騷擾佢啦！幾廿歲人，一生出嚟叫我阿爺喇！（有心有力？）呢方面唔需要啦。」現年65歲的他承認進補後，由朝踩到晚仍然勁精神：「Keep住補冇問題，但都需要多啲勞動、運動，雖然我副偈勁揪啫，但都唔好谷爆。」
拒出錄像有原因
提到過往演唱會都未有推出過錄像，阿B坦言想歌迷珍惜睇騷：「拍都係留畀自己做記錄！若果知道要拍嘅話，就會有啲閘住閘住，唔會去得咁行，而最大原因係買飛入場嘅歌迷會覺得更珍惜。」曾推出過超過40張唱片的他，經典作有《閃閃星辰》、《要是有緣》等數之不盡，他指不少歌迷已給他歌單，亦準備以九成舊歌與歌迷一同集體回憶：「因為音樂係最快可以下載到所有回憶，當然會唱一班老友嘅歌，因主題係『故事繼續』嘛，由自己、朋友、家庭、電影帶訊息出嚟畀大家。」
女兒做嘉賓唱老歌
另外，他昨日到電台受訪透露，演唱會嘉賓會有溫拿及女兒鍾懿：「個女想唱嘅歌我唔畀，因為啲人嚟係想聽舊歌多啲，我話要第一句人哋就知係咩歌先得，咁佢都搵咗首英文老歌。」又笑言囡囡有教他跳舞，但難度高到他做不到：「惟有搞第二啲嘢！（咩新嘢？）唔知啊！賣關子，講唔到咁多，再講就要除衫o架啦。（真係騷肌？）唔係呢種。」