吳耀漢寸「親家」拜金：有車有樓唔揀你啦！
藝人吳耀漢昨日出席公開活動，談及兒子吳嘉龍的婚事時，寸「未來親家」嫌兒子經濟能力未達標，要等他發達才有商量！雖然對吳嘉龍女友印象不俗，但對於幾時飲新抱茶就揚言一切隨緣，並不心急！
張繼聰、王菀之、恬妞及吳耀漢等昨午齊集西貢，為林敏驄執導賀歲片《如珠如寶》開工，最近有指吳耀漢兒子吳嘉龍有意結婚，但女友的家人不太贊成，吳耀漢說：「佢哋等緊我個仔發達。每個媽媽都想個女搵到個有車有樓嘅，但有嘅話又未必會揀你個女啦！一係佢幫個女搵個好啲嘅囉！」但他坦言對兒子的女友印象好：「佢好乖，有中國人傳統思想，但我未見過佢媽媽。（心急飲新抱茶？）我比較西化，呢方面隨緣！（幫兒子置業？）唔會，呢方面我同佢傾過，佢真心喜歡拍戲，只係外形有啲限制。佢其實都好忙，拍咗幾部電影，只係除咗《無雙》外其他嘅未上映啫！」
張繼聰色誘恬妞「復出」
張繼聰笑言冇劇本，亦不清楚自己角色：「淨係知古仔係講兩代承傳，但紙仔都冇得飛，環保呀！」林敏驄說：「拍完咪有（劇本）囉！」又大讚阿聰今次表現充滿自信，喜劇方面算是張家輝接班人：「張家輝話唔再拍喜劇，今次我用張繼聰價錢，請到『張家輝』拍戲，我仲叫佢用美色引誘恬妞嚟開工。」
久違的恬妞返港拍戲，她說：「十幾年冇返嚟拍嘢，今次個故事好吸引我。（林敏驄話搵張繼聰色誘你返嚟！）都有少少因素啦！」她透露第一次跟王菀之合作，有不少對手戲，讚對方「戲好歌甜」，但擔心自己轉數不及對方。
