何廣沛親熱戲痛苦回憶 劉佩玥變「榴槤玥」
何廣沛與劉佩玥等前晚於飯局睇主演劇集首播，他自爆最難忘的「親熱戲」是被劉佩玥大整蠱將榴槤塞入口，高呼「痛苦」！
無綫新劇《跳躍生命線》演員何廣沛、劉佩玥、陳瀅、張曦雯（Kelly）等前晚在觀塘出席劇集首播飯局，孭飛台慶劇的何廣沛笑謂收視壓力在馬德鐘身上，覺得劇集有26、27點收視已滿意。劇中他與劉佩玥扮演情侶，親熱戲不多，最難忘一場竟是一起吃榴槤，他笑說：「我最憎食榴槤，點知佢塞落我口度，好痛苦。」問他會否考慮騷肌谷收視？他笑說：「騷肌就交畀郭子豪、張彥博，我要為新劇《黃金有罪》減肥，起碼要減到冇肚腩，70、80年代嘅人好瘦，睇番《家變》見到任達華、夏雨都好瘦！」
陳瀅喊戲收唔到掣
至於劇中要主動追求馬德鐘的張曦雯，笑謂現實中也試過主動出擊，而且次次都成功，自言性格是想做就去做。陳瀅則表示與影后羅蘭飾演嫲孫，問到拍喊戲可有壓力？她說：「好輕鬆，因為現實中都係孫女，同羅蘭姐好快有嫲孫感覺，拍喊戲入到戲就唔難，試過停咗機都收唔到（眼淚），喊到心痛、心裂。」此外，賴慰玲、蔡思貝、陳嘉寶、何雁詩與吳嘉熙為10月壽星陳瀅慶祝生日，懷孕超過六個月的陳嘉寶拍照時站在後排遮肚，不過還是面尖尖零孕味。
