余德丞向思貝求婚約出埠培情
藝人余德丞（Dickson）大病過後終於復工，孖緋聞女友蔡思貝出席活動時「打情罵俏」，下跪「求婚」之餘，還見家長兼影「全家福」，更約緋聞女友一齊「出埠」。思貝許諾以後對Dickson溫柔點，明言感情升溫！
Dickson自8月8日晚在球場踢波期間昏迷，休養個多月至昨午出席活動正式復工，獲大批粉絲舉牌支持，教他感動不已，連聲多謝家人、朋友及香港市民一直為他打氣。活動上他與蔡思貝頻頻耍花槍：「我一醒番你就剪頭髮，差啲唔認得你。」當玩用蔬菜砌成花束的遊戲時，他竟當眾下跪向思貝「求婚」，在場的蔡媽媽見狀大力拍掌！事後記者拉攏「一家四口」合照，蔡爸爸更趁機捉着Dickson送祝福。
承諾會溫柔啲
談到兩人的友誼，思貝雖表示未試過單獨約會，但坦言：「佢暈咗時我好震驚，即刻趕去醫院，我先發現好珍惜呢個朋友，可以話友情升溫嘅。我以前對佢Man啲，依家就溫柔囉。」Dickson聞言即向她講「對唔住」，更提議與對方再拍旅遊特輯，認真Sweet！
提到身體情況，Dickson說：「精神o架。（可以講吓昏迷時嘅情況？）踢踢吓波好眼瞓，咪喺場邊瞓着，跟住……醒番，其他嘢完全冇印象，我知有人拍咗片都冇睇番，咁恐怖，睇依家靚仔樣啦。聽媽咪講我瞓咗兩、三日，醒番唔係即刻落到床咁誇張，但已經係奇迹。（做過手術？）冇呀，醫生話我心臟亂跳，即係心律不正。喺醫院有食藥，依家停咗嘞，但吩咐我呢兩個月唔可以做劇烈運動，我咪睇吓波先囉。」
劫後學懂珍惜
問Dickson大劫過後有甚麼得着？他坦言：「叫自己慢活啲，唔好咁心急，要珍惜生命同朋友，以前人哋一句『祝你身體健康』好似冇乜嘢咁，但經歷過後就知一切唔係必然。」對於無綫高層樂易玲表示會力捧他，他說：「想復工先，其他嘢聽從公司安排啦。」