楊盼盼三級燒傷留醫割死皮

楊盼盼前日拍攝一場火場戲時燒傷，昨日流出兩條意外片段，見到火勢突然失控，衝向人群，當時現場約有30人，爭相走避，場面混亂！昨日《大》監製林德榮開記者會交代，向傷者及其家屬致歉外，直言會負全責，同場的醫生則指即時送院的盼盼臉部燒傷外，右手亦嚴重燒傷，已為她割死皮，還需留院一段時間。林德榮透露盼盼拍該片後本來會做盆骨手術，如今手術要延期。

梁祖儀報平安

盼盼女兒Jessica替母親報平安，指她屬三級燒傷。據知，盼盼現時精神還可以，會留在馬來西亞醫院診治，暫不考慮回港就醫。前晚盼盼也有玩Instagram，更在限時動態分享友人送上的花籃，以及轉發化妝師感謝她送上水晶梨的短片。同告受傷的馬來西亞藝人梁祖儀亦上載臥在病床的自拍照，留言：「心情還在平復中，我沒事，燒傷了雙腿，會好的。」

有份參演的羅家英避過一劫，他昨日傍晚抵港，透露探望過盼盼：「情況好啲，燒到一剎當然好痛，見佢塊面搽咗好多燙火膏，成面都係，都好擔心，佢面部係二度淺層皮膚燒傷，手就三度燙傷。當時我唔需要入場，係離遠見到，其實劇組工夫做得好好(口架)喇。（擔心盼盼毀容？）問過醫生話冇嘢，都係水泡，換過新皮應該冇事。」

有女仔受驚猛嗌

他又否認因火槍引起火災：「係啲電油漏咗喺地下，之前又落過雨，啲電油浮喺水面，係電油搶火，啲公公婆婆見到火都走唔切，係一兩秒嘅事，楊盼盼都好擔心其他人。」問到會否有陰影？他說：「我都睇慣呢啲場面，現場有女仔受驚失晒控，不停叫咗成個鐘，嗌到想嘔咁。」

此外，汪明荃昨日出席記者會，提到盼盼臉部燒傷時說：「盼盼好勇敢，意外嘅事冇人想發生，其他人都有傷手同腳。」問到可有擔心老公羅家英而失眠？她說：「咁又冇，反而前一晚打風瞓唔着。」