陳家樂玩命3樓高吊臂追逐
藝人陳家樂出席活動時自爆拍戲玩命，不熟水性的他要「墮海」之餘，更於日前身處3層樓高的環境下拍攝追逐戲，可謂一步一驚心。同場的洪卓立則因操練過度弄傷腰骨，舉步維艱！
陳家樂、洪卓立、曾樂彤及許靖韻等昨午到馬鞍山出席《英皇電競菁英盃2018》記者會，場面熱鬧。家樂表示近日忙於拍攝英皇電影《神探大戰》，日前更「賣命」演出：「喺隻船上面，我同湯怡喺等同3樓高嘅吊臂上追逐，只係得大約一個身位咁闊，好易差錯腳。拍嘅時候正常咁演戲，但停低諗番先識驚。（冇同屋企人講？）冇，到佢哋睇戲先算啦！嫲嫲知實鬧死我，以前拍打戲佢都信以為真！」
重提前度送禮
另外，他表示已「戒打機」十年，並說：「曾經試過因打機荒廢學業，所以戒咗，但去年生日，朋友（前度）送咗部遊戲機畀我，先發現依家打機配套好多，感官好刺激，呢排都有約班朋友玩足球Game。」
操練過度整傷
至於洪卓立一臉倦容，他透露日前健身時不小心弄傷腰骨，刻下舉步維艱。他說：「當時嘭一聲就知賴嘢，但教練話好多人都試過咁，即使睇醫生都只會畀止痛藥。好想快啲好番，演唱會舉行在即呀！」由於腰患關係，他擔心未能在颱風前在家居做準備：「依家彎唔到腰，但趕住返屋企執露台，水浸就大件事，會成屋濕晒。（叫女友幫手？）唔得，佢都喺自己屋企睇住間屋呀！」
