張家輝激勵！劉寶業國際賽爭光
現年23歲的模特兒劉寶業（Vincent）代表香港參加被譽為全球五大國際男性選美賽事之一的《全球先生競選》（Mister Global），憑出色表現打入十強，是香港有史以來最好成績！
雖然Vincent最終未有得獎，但首次參選的他認為贏得友誼最珍貴：「好開心識到唔同國家嘅參賽者，有啲仲有聯絡，我仲寄咗月餅畀荷蘭先生！」對於差一票奪「友誼先生」，Vincent直言：「係有啲可惜，不過阿富汗先生係實至名歸，呢個獎係參賽者互投，攞到獎係Bonus。」
為以最佳體態參選，Vincent在兩個半月內勁減18磅，坦言減肥壓力大過參選：「以前食得太誇張，所以減肥好辛苦，不過培養咗好習慣，依家一個星期有三、四日做Gym。」他直言在減肥期間，以當年電影《激戰》的張家輝為目標：「佢可以咁努力，我咁後生，點解唔可以畀啲Effort？不過問心，出嚟效果唔係好滿意，減肥後肌肉唔夠，上台顯得有啲瘦。」他表示對演戲有興趣，希望向影壇進發。