何基佑情人駕到幫囝囝減壓

藝人何基佑與太太鍾凱瑩結婚七年，依然十分恩愛，早前接受專訪時，表現相當Sweet，閃爆全場！身為ViuTV節目《超級奶爸》主持的Kay，除了婚姻美滿，亦滿腹育兒心得，即將再任爸爸的他，被問到如何教導兒子清義去跟妹妹和諧共處？Kay說：「唔少家長都會遇到小朋友呷弟弟妹妹醋嘅問題，首先，我哋千祈唔好畀咁多責任佢哋，話畀佢聽細妹細佬出咗世，佢要點樣照顧佢，要做啲乜嘢，咁會令佢慢慢討厭做哥哥、姐姐呢個角色，要灌輸佢嘅訊息係一家人要相親相愛，邊個有需要就愛邊個，妹妹細佬出世就多一個人錫你，咁樣就會令佢哋好期待弟弟或妹妹幾時出世。」車仔笑言現在兒子不時會錫她的肚皮，並冧滋滋地對住肚皮說：「哥哥錫你呀！」妹妹未出世已經非常有愛。

教功課冇難度

Kay最近忙於拍攝《超級奶爸》第二季，今季將有更多棘手個案出現，當中包括被不少家長視為最破壞親子關係的「教小朋友做功課」，Kay亦有法寶把問題解決，他謂：「教小朋友做功課，係好多家長抹汗嘅事，亦會出現嗌交情況，成家人都唔開心，節目裏面，將會教大家點樣可以令小朋友在合理時間之內完成所有功課。」上一季節目相當受歡迎，不少網友遇到育兒問題都會在網上請教他，難怪被喻為「湊B百科」，能夠為網友解決疑難，Kay當然也相當高興！

何基佑咁大男人，要大肚老婆按摩服侍？

咀住都要送心心，恩愛到毛管戙。

斟「嘉欣系」分享

談到今季會請甚麼嘉賓分享？Kay幽默地笑指當然希望請到「嘉欣系」嘉賓：「我心目中當然想請鍾嘉欣、林嘉欣、李嘉欣呢啲好媽媽上嚟啦。（唔怕老婆呷醋？）唔會，我為大家謀福祉，呢啲都係好多爸爸媽媽喜歡嘅，但當然要睇電視台安排，我會碌吓卡嘅。」

髮型、化妝：Joanne Chan@Starry Avenue

場地：Hot Culture