陳小春股惑佬捱打畀嘉樂50分
陳小春、錢嘉樂、鄭伊健、謝天華及林曉峰繼1996年電影《古惑仔》系列後，相距廿多年再合作新片，感情與默契均「爆晒燈」，小春為拍該片瞓晒身，受「股傷」之外，更「硬食」曾志偉一巴，不過該場捱打戲，其內心戲做得非常好，相當搶鏡！
錢嘉樂執導新片《黃金兄弟》找來一班「古惑仔」好兄弟演出，雖然事隔廿多年再合作，期間又各有發展，但感情並沒因時間沖淡，早前眾人聚首受訪開懷互爆料兼互窒，笑聲拆天。錢嘉樂甚具號召力，拍攝時眾人全部瞓身演繹，天華為一個不見樣的鏡頭，願意坐四十多個小時飛機去拍，毫無怨言，難怪錢嘉樂笑言自己最大優勢是不用叫，眾人已會主動埋位兼幫手度嘢，投入度十足，令拍攝相當順暢。
情緒湧現唔使排戲
陳小春於北京拍攝一幕吊威吔翻滾戲時曾受傷至動彈不得，他說：「本身試咗十幾次都冇事，點知一正式拍，就成個人撞咗落去一個收音咪盒度，當時痛到觸電咁，之後要去醫院照磁力共振，擔心盆骨有事，好彩只係傷到股肌，因為當日出事我郁唔到，真係好灰，好多嘢擔心！」
此外，小春亦有一場講述因內疚跪地畀曾志偉大力掌摑的戲份，當時原本需要綵排，但未排到戲肉，他已情緒湧現，最終直接拍攝，出來效果相當好，其演繹令人動容，演得相當搶眼。
林曉峰想揼天華
相隔十五年錢嘉樂再做導演，擁豐富動作導演經驗的他，實力不容置疑，叫眾人搞笑打分，陳小春「竟然」畀50分：「套戲未上又未有續集係咁多先啦！」錢嘉樂即幽默說：「當年徐克監製嘅《英雄本色》，佢都係畀廿五分咋，所以依家有五十分都好滿足！」鄭伊健則笑言開心指數有一百分，天華則指有百幾分，惹來林曉峰挑機：「如果唔係鏡頭拍住，揼咗你。」但結果他卻畀一萬分。
陳小春服裝：楊龍澄
謝天華服裝：McQ@ITHK
場地：馬哥孛羅香港酒店