陳展鵬驚爆囍訊 10月閃娶單文柔

41歲「視帝」陳展鵬昨日突然宣布，與28歲落選港姐女友單文柔（Phoebe）結婚！他除了親自報喜，還分享多張在英國及法國取景的婚紗照，身穿低胸婚紗的Phoebe晒爆乳，兩人相擁而視甜蜜恩愛，上月被拍得蜜遊倫敦，原來是實行結婚大計！展鵬表示：「今日好高興向大家宣布，我要結婚啦！一路以來，我都全情投入工作，直至Phoebe的出現，讓我們感受到幸福與信任。對於感情比較傳統的我，是時候用最大努力去建立一個美滿的家，希望得到你們的祝福。」

盡量低調 儀式會做足

消息傳出後，展鵬接受娛樂新聞台訪問，直認早已決定人生新一步：「我哋接近拍拖兩年，需要時間磨合同睇性格，都要雙方家長傾過偈，所以我哋已經有晒安排。（幾時行禮？）10月中，都想盡量低調，儀式會做足，食飯只係雙方家長，唔會話請好多朋友、擺好多圍，因為家長都想低調。（幾時生B？）隨時都Ready，呢啲講緣分同睇天安排，搞掂婚禮先。（影埋相先公布？）今次成個過程好刺激，因為想同大家分享，又怕畀人偷影咗一、兩張擺上網而穿煲。」

「女主角」Phoebe亦大方回應婚訊，踢爆展鵬先後求過兩次婚，第一次只用紙戒指而派檸檬Say No：「佢趁我瞓覺，用一隻自己摺嘅心形紙戒指戴喺我隻手度，我醒咗就問佢：『咁叫求婚喇？』始終我想要一個畫面，所以話唔答應，但其實好開心！到咗英國，佢搵咗條街有巴士，當住咁多人跪地求婚，我一直好期待呢個畫面，好感動！（依家心情點？）好興奮、緊張，好多嘢要準備，但我哋都希望低調，有一個屬於自己嘅美好回憶。」被問到是否雙喜臨門，她否認說：「我都想三喜臨門！好多嘢隨緣。」又直言沒想過如此早結婚，但最終被對方真誠打動。

單文柔晒巨胸又閃嫁，惹來「雙喜臨門」疑雲。	兩人被發現蜜遊英國，原來是影婚照！	放大圖片

「係我欠咗Phoebe」

被爆兩度求婚的展鵬，以短訊回應傳媒的祝福，提到跪地求婚，他說：「呢樣嘢係我欠咗Phoebe！要做埋呢Part佢先應承，所以嗰日就影咗呢張相。我哋10月正式簽字，至於仲有乜嘢安排，到時再同大家講！再次多謝大家嘅祝福。」當再被追問是否「雙喜臨門」而閃婚？他與未婚妻明顯夾了口供，互相呼應地說：「我想四喜臨門添！」

陳展鵬指拍攝過程勁刺激，因擔心被途人認出而「穿煲」。	放大圖片	放大圖片

去年3月，展鵬與Phoebe被發現在山頂密會令戀情曝光，當時已交往一段時間，但被男方粉絲指「不夠班」而惹抨擊，他即開腔護花。不久，兩人再被拍得齊齊睇傢俬，但否認同居。經過一年多時間磨合，兩人感情開始浮面，經常出雙入對亮相活動，不少人已認定這位「展鵬嫂」。