張文慈意興闌珊:啲人係咪鍾意睇我拍戲?

九月壽星張文慈(Pinky)及何佩珉(Mandy)等昨日到將軍澳電視城出席「九月星辰」活動,Pinky忙於拍新劇《解決師》,未知生日能否放假,更表示為前路煩惱:「喺生活現實同體力上,都覺得有啲意興闌珊,覺得睇唔到方向,會諗『啲人係咪鍾意睇我拍戲?』,覺得去到一個交叉點。(因為約滿煩惱?)唔係,我同公司仲有幾年約。」

而Mandy將迎接最後一個單身生日,準備與好姊妹狂歡及與男友出國二人世界,問是否去最近天災頻生的日本?她說:「唔係!我哋去布吉,都算好好彩。」她剛拍完新劇《鐵探》,今次較少動作戲,問是否想婚後錫身一點?她說:「唔會!反而想搏殺啲,30歲前盡做。」