迪子毀容硬食惡評內傷心寒

迪子的歌曲《美哉》以「人只着重外表」為主題，沒料到寫好後就在韓國一間Cafe遇上意外：「親身感受到冇咗外表嗰種心靈上嘅痛苦，我撞到個人腫晒，牙又崩，周圍嘅人都用嚇一嚇嘅目光望住我，我知道佢哋唔係有心，但都會好唔開心。」她坦言當時內心很脆弱，家人亦為她擔憂：「嗰時唔知點算，冇理性去消化網上留言，最難聽係啲人話『咁醜樣，毀咗容都冇乜所謂啦！』原來唔夠靚，毀容都係抵死嘅。呢個世界有人可以涼薄到咁，我覺得好心寒！」

有心人主動贊助

她直言沒錢亦沒想過整容，身為獨立歌手，寧願將錢放在音樂方面，幸有人願意贊助她整牙兼微調外貌：「間醫院贊助過韓國一個整容節目，我畀媽咪睇，佢睇完唔係話得定唔得，而係問我幾時去。我啲朋友覺得好好笑，點解有阿媽咁同個女講！」做過資料搜集後，她就決定博一博，笑言不怕再有意外：「人生好多嘢估計唔到，好似我咁，仆都可以仆到咁樣，咁黑嘅嘢都畀我遇過，應該唔會咁快又有第二次啩！」

削骨唔使再遮掩

雖然說得輕鬆，其實她亦曾感害怕，只是忙着把整件事拍成《美哉》MV才暫時忘掉：「瞓到落手術床，臨落麻醉藥前嗰幾秒先有啲驚，但已經冇得後悔，一醒番個手術已經完咗。」問到是否重拾自信？她指牙齒崩裂時連笑都不想笑，現時已沒問題：「同埋最滿意削咗顴骨，以前我會用頭髮遮遮掩掩，唔好畀人見到塊面好闊，依家夠膽整起晒啲頭髮。」對於會否有後遺症，她暫時不擔心：「細佬之前打籃球撞歪過塊面，我呢次手術同佢差唔多，都係調配骨頭同脂肪，又冇擺假體喺塊面度。佢做咗手術咁多年都冇事，所以我對手術都有信心。」

網民涼薄，令迪子蒙受心靈創傷。

飛來橫禍，迪子去旅行搞到崩牙毀容。

場地：he/art studio