林欣彤唔再做小三放長線識男仔

歌手林欣彤（Mag）加盟王祖藍公司後，事業再次出發，最近她推出新歌《Da Di Da》，並宣布在12月舉行首個個人演唱會，她坦言非常開心：「出咗道咁耐，未做過個人售票演唱會，所以好期待，同埋要還畀粉絲，大家等咗咁耐。」

開心遇上好老闆

Mag覺得好老闆難求，因為祖藍願意聆聽她的意見，並會盡力做到她想做的事。雖然兩人試過持不同意見，但不會堅持很久：「我哋會keep住傾，都係為件事好，如果老闆意見係好同埋我又學到嘢，我就會跟，又或者如果我嘅意見老闆信任嘅話，佢都會跟。」

事業發展順利，愛情方面Mag亦「戰績彪炳」，早前傳她成為組合天堂鳥成員Tyrese與前度余思霆的第三者，對於被指是「最強小三」，豁達的Mag坦言不會不開心：「入行以嚟好多呢啲新聞，所以已經睇化咗。」她坦言不會因為輿論而改變自己的生活：「有啲人話以後唔好同男仔食飯，但我覺得冇咁嘅必要，又或者有時畀人影到搭巴士，我唔會因為畀人影到而改變自己生活，因為呢個係我生活節奏，同埋都係一個話題。有前輩講過『呢行做嘢all the good news and bad news都係good news』，大家都係關心，如果做乜都冇人理係幾慘，所以都係好嘅。」

林欣彤年底開騷，希望以最佳狀態見歌迷。

Tyrese與余思霆分手，令林欣彤背負小三之名。

太宅難識新朋友

現實中，Mag坦言接受不到做第三者，之前試過無意中做了，但覺得愛情永遠不是一個人的事，故她現時學會花更多時間觀察一個人：「呢方面我好渣，好易人哋講咩都信，所以依家要放長啲去睇。」問到現時可有觀察對象？她大嘆：「冇，好dry呀！」隨即笑言：「唔緊要嘅，做嘢緊要啲，但唔知點解真係冇，我有反省過嘅，可能係我太宅，好少識新朋友，有時啲場合好多唔識嘅人，我好多時會選擇唔去，但近年已經多咗，我都覺得要識多啲人，但都覺得如果緣分到係唔使特登咁做，所以都係做好自己先，如果遇到適合嘅人就捉得住。」

髮型：Ritz Lam@Hair Corner