孫耀威踩Roller煞食拖女無數
孫耀威破天荒結合演唱會與花式滾軸溜冰，名正言順請來靚女教練陪他練習，自爆當年經常蒲Roller Disco識女仔，着上溜冰鞋的他特別有自信，更霸氣表示拖過無數靚女的手仔！
出道25年的孫耀威（Eric）將於11月16及17日假九展舉行首個香港賣飛演唱會，在舞台上表演花式滾軸溜冰，日前他在靚女教練Angie Wong指導下，於滾軸溜冰場全副武裝示範無敵交叉步，笑言：「好似薛家燕嘅無敵十字步！今次個騷希望用唔同動作跳溜冰舞，要熟習轉圈同Moon Walk，真係唔容易。」
自爆中學時期曾熱衷去Roller Disco的他，笑言是追女仔必備：「嗰時呃阿媽扮去童軍活動，其實去咗玩。揀一個鍾意嘅女仔拉龍，發覺佢幾好傾咪慢慢傾吓偈，跟住攞電話，發覺唔啱就一個急停，揈咗佢去出面就拜拜！」
有自信乘機攞電話
至於拉過幾多女仔手，他笑言數之不盡：「我平時唔夠膽問女仔攞電話，但着住溜冰鞋就特別有自信，夠膽問人攞電話，尤其係唔識踩嗰啲，我可以扮勁。（太太陳美詩有冇呷醋？）我買埋溜冰鞋畀佢，但佢到依家都未着，既然佢畀機會我同靚女教練玩，其實都唔錯，Angie除咗有技術，仲係靚女，佢喺我前面我會踩得好快o架！」
廿年冇玩一點就明
Angie曾在本地及國際賽贏得多項佳績，雖然Eric自嘲「吔吔烏」，她卻讚他比想像中好：「佢話20年前玩過幾次就冇再玩，以為要由初學教起，但佢一嚟就後溜，好多花式一講就做到。」
近年國際時裝品牌趁復古潮推出4轆溜冰鞋，Eric希望多些年輕人參與這運動，不過其自家西裝品牌就不會加入製作行列：「我未到咁專業，要逐個轆去買、去配，迎合唔同花式、場地。我好期待之後啲Crossover，應該好靚仔。」