亞姐張靜茵玩盡三台選美
十位入圍亞姐昨日在大埔亞視總台見傳媒，高層何麗全表示后冠及權杖價值一千萬，其他獎金、獎品亦有贊助。佳麗中最索的張靜茵更玩盡三台選美，經驗豐富。
《2018亞洲小姐競選香港賽區》將於10月7日舉行決賽，稍後會到佛山，勝出佳麗有機會到韓國集訓，與大中華賽區及海外賽區20位佳麗到馬來西亞馬六甲參加總決賽。昨日所見，佳麗質素普通，但有半數佳麗有選美經驗，(2)梁雪瑤、(3)張靜茵、(5)蘇頌筠、(1)李芷菱先後參加過港姐面試，可惜統統出局！如今又再參賽，令亞姐變成「港姐收容所」！
佳麗中最索要數張靜茵，曾參加過2017港姐競選面試，最近更參加ViuTV節目《Good Night Show 廣告女皇》，但據悉已出局，今次再接再厲參加亞姐，她說：「我形象比較斯文，係氣質型，所以選美比較適合我。《廣告女皇》亦同亞姐冇牴觸，一個係節目，一個係選美。」A賴嘉瑩（Karen）則參加過「Miss Amazing 環亞美神大賽」。
港大碩士研究生畀「堅」喜
最出位的是(10)林孜沫（Momo），是港大教育碩士研究生的她自信爆棚，不停郁身郁勢擺甫士及拋媚眼狂放「生電」，不過來自內地的她口音極重，她笑說：「就算廣東話講得唔好都係我嘅Character，可以畀大家記住我都開心，可以畀到『堅』喜（驚喜）大家。（你似邊個明星？）冇呀！我太醜樣、太特別喇！」
樣貌後天加工？
至於(6)張靜婷的「V煞面」、(7)溫馨與艾美琦撞樣，不禁令人懷疑兩人樣貌經過後天加工。而溫馨穿上大會提供的裙，心口卻透Bra，認真騎呢！她解釋：「因為我太瘦，只可以搵到件好似泳衣嘅衫，但係又着唔到Nude Bra，導師話唔緊要，有個Bra都係一個特色，可能佢想整蠱我啦！」
亞視行政總裁何麗全被問到后冠價值貴過港姐，他說：「唔能夠比較。（曾志偉做唔做亞姐司儀﹖）傾咗兩句，我哋虛位以待。（多位佳麗選過港姐？）唔緊要，仲好啦有經驗！（有佳麗疑似整容？）係咩？我哋參賽標準冇呢樣嘢，有足夠信心就得。」