曾樂彤減肥變暴食嘔到七彩
英皇力捧的新進歌手曾樂彤自爆讀書時的「頹廢」生活，足不出戶煲劇過日辰，直至找到目標才改變生活方式。她笑言最大缺點是為食，試過為拍劇而節食，但反而患上暴食症，食到狂嘔！
由KOL轉型歌手的曾樂彤，為東網巨星節目「海馬牌床褥特約」《閨蜜睡房》擔任嘉賓，與主持李惠儀分享少女心事。身為網紅的她自爆遇過網絡欺凌，初時會不開心，但時間久了，她學懂接受有建設性的批評。
學生時期的她未找到目標時，生活百無聊賴，她說：「以前我唔知鍾意乜嘢，暑假嗰時真係日日喺屋企煲劇，煲到凌晨四點，食完兩個即食麵，瞓幾粒鐘朝早再煲，跟住又喺度埋怨，點解啲朋友約極都唔得？因為佢哋已經好有目標。直至我轉校，終於搵到自己嘅目標，就係表演，自此不停拍片放上網，依家生活顛倒、不停訓練逼自己成長。」
最憎男友講大話
身形瘦削的她自言是為食妹：「我可以狂食嘢，咁多年來我冇試過keep fit，直到casting一個網劇，突然意識到係咪要keep呢？我就開始近年好流行嘅生酮飲食，類似戒糖戒澱粉質，結果體重跌落一百磅，維持咗一個星期我頂唔住，又食番嘢，嗰時有暴食症，試過每日食一盒雪糕，真係食到嘔！」提到她與游學修的感情事，她選擇低調不回應，但問到最憎另一半做的事，她即說：「講大話！」想知道更多曾樂彤的感情世界？記得本周五、六、日收睇《閨蜜睡房》！