黃宗澤口快快爆屋企收埋條裙
黃宗澤再做老闆，獲黃翠如等好友撐場，但他踢爆對方應承低胸現身，但最後因冇借裙而食言，他即嬲嬲豬說：「我屋企有條裙借畀佢！」反被追問為何家中有裙，只好解釋是圍裙。
藝人黃宗澤（Bosco）的蠔吧新店昨日於尖沙咀開幕，一眾圈中好友包括苗僑偉、黃翠如、岑麗香、袁偉豪與張繼聰等都有到賀。再做老闆的Bosco受訪時坦言投資金額「坐底」七位數字，提到苗僑偉笑指新店擠滿捧場的好友及記者後嫌店細，他笑說：「佢咁高輩分，冇過萬呎都嫌細啦！」當被指投資穩健，他笑說：「慣咗落手落腳做，我哋有總廚、總經理，我就係總打雜。」
緋聞女友訂位捧場
而翠如笑指到Bosco餐廳食飯不用「找數」：「未試過畀錢喎！我以為係唔使錢，酒又任開。」對方聞言即說：「呢啲難聽過粗口啊！咪又係我畀，應該講清楚係我請客，又食又拎咪呢啲囉！」曾在節目《美女廚房》中煲粥成熱話的她笑言可以到店幫手煮「蠔仔粥」，Bosco唔領情兼爆料：「我哋做西餐喎！佢前晚仲話會低胸露背嚟，點知佢又話冇借裙，我話咪點我啊！我屋企有條裙借畀佢！（吓！點解有條裙？）畀條圍裙佢！（有冇叫緋聞女友陳嘉桓？）有叫佢，佢之前都有搵我訂位食飯。（有冇畀錢？）有！呢啲咪好兄弟！講起翠如就嬲嬲豬呀我！」香香則被問到知否食蠔有甚麼作用時，她說：「唔知呀！哈哈！我今日係嚟開工，呢身打扮係咪襯埋張枱布？」
另外，前度胡杏兒都有送上花牌，Bosco表示事前有通知對方，所以大方恭喜。