惠英紅壓力爆煲手腳發紫
影后惠英紅、滕麗名（阿滕）及譚偉權等昨午出席舞台劇《玻璃動物園》記者會。惠英紅及阿滕「處女下海」演舞台劇，當中惠英紅的對白冗長繁多，她坦言：「見到劇本有後悔（接演），打開劇本已經好大壓力，我左眼即爆微絲血管，翌日手腳出現紫色，醫生問我搞乜？開工連唔到戲，好彩拍我同戲裏面個仔交代身後事咋。」
阿滕培養「母女情」
舞台劇將於12月底公演，惠英紅已成功將大部分台詞記入腦袋，令戲內的女兒阿滕佩服不已：「我嘅對白同紅姐比，我只佔0.01，今次最驚係對手講完大堆嘢，個腦突然空白，自己接唔到口。（點同惠英紅培養母女情？）我哋合作過多次，只要唔好遲到、乖乖哋同唔好忘詞就實有『母女情』嘞。」她直言到演出前約1個月，會要求暫停拍攝《愛·回家之開心速遞》，全情投入「第一次」，戲中她演自卑兼患輕微小兒麻痹症的女生，更要一展舞技，可謂很大挑戰。
惠英紅亦表示11月左右將「閉關」，完全不接其他工作。台上她被爆出面「搞掂」經理人公司英皇讓自己接演，她說：「我哋呢啲老人家自由度大啲，只要想做嘅嘢、價錢合理，通常都畀我自己決定嘅。」