何傲兒舞嚟舞去懶蛇嗒糖
藝人何傲兒因主持網上節目而變成「旅遊大使」，收到不少網民留言要求「指點迷津」，笑言變成「香港通」的她日前落區挑戰膽量玩蛇。
何傲兒近年為網上節目《傲遊》擔任主持，每集都會捐窿捐罅，介紹香港地道好玩好吃的地方。曾到旺角介紹蜘蛛與蠍子的她，早前再挑戰膽量介紹蜥蜴及寵物蛇，雖然最怕爬蟲類，但她仍大膽地拿着蛇拍攝！
玩蛇期間，何傲兒表現十分鎮定，但她坦言內心其實勁騰雞：「拍之前我都同導演講咗，爬蟲類動物我未必夠膽拎上手玩，但去到現場見到條蛇白雪雪，懶洋洋又好似冇乜殺傷力，所以鼓起勇氣，只要佢唔好直視我就唔驚。（你唔好望佢囉！）控制唔到！但條蛇好純、好可愛，玩玩吓仲捲埋一舊好似饅頭。」看來牠狀甚享受。
變「香港通」網民求行程
雖然進軍網絡世界，但她指以往沒有打理網上平台，直至參演內地劇《歸去來》後才開始認真管理，揚言粉絲的每一個留言都會看：「粉絲嘅留言畀好大動力我，我鍾意交流，佢哋會糾正我啲普通話發音！今個節目係全普通話對白，佢哋都有提醒我咬字，好似每集最後我都講：『我們下集見啦！』網民會留意我愈講愈正，令我有進步！最近有啲粉絲話準備嚟香港玩，問我有乜好地方去，當咗我係香港通。」
