龔嘉欣呻谷胸辛苦解放咪咪

香港鐘表展昨日開鑼，龔嘉欣與傅嘉莉（Kelly）出席國際名表薈萃交流酒會及招待晚宴，穿大露背晚裝的嘉欣直認真空上陣：「因為最近拍劇成日着bra top露腰，谷住個胸好辛苦，咁我之前都有試push up bra，但出嚟效果怪怪哋，咁不如真空。」她又稱最近為新劇《殺手》日操夜操，消瘦不少，連上圍亦縮水：「我依家轉路線，晒老鼠仔、馬甲線同腹肌。（拍打戲有冇受傷？）有啦，遮咗咋！成身好多瘀傷，套戲係真打冇替身，同埋我要同黎耀祥講對唔住，因為成日打親佢，好多部位都畀我打過，而且我專打男人最痛個位，所以佢哋要加啲嘢護住，但依家未打到呢部分。」

鄧鉅明買兩物業放租

而Kelly穿上白色低胸晚裝裙，大騷「事業線」。11月才拍新劇的她透露休息時接了不少工作，問到賺了多少？她坦言有六位數，希望儲多些錢買「磚頭」。

莊思敏（左）帶病現身，被思明懷疑患登革熱。

鄧鉅明於活動上主持揭幕禮。

至於太子珠寶鐘錶集團主席鄧鉅明，為其公司呈獻的Ｗorld Brand Piazza 2018主持揭幕典禮，是次活動匯聚13個國際鐘錶品牌的多款矚目名錶。他透露剛於西環買了兩個物業，主要放租，其中一個33,000呎商場有6個舖位。

莊思明冇錢築愛巢

而藝人莊思敏（Jacquelin）與妹妹思明（Lisa）以「姊妹檔」上陣，帶病在身的Jacquelin透露患感冒及發燒，慨嘆冇人照顧，並不滿妹妹經常帶男友回家：「見到佢同男友楊明好似連體嬰咁，成日喺我面前出現，我冇眼睇，每次都返入房。」問到Lisa是否已與楊明同居？她說：「都唔算，得閒就上吓嚟瞓吓。（唔係築咗愛巢？）邊有錢？冇錢買。」期間Lisa問抱恙的家姐有否被蚊蟲咬過？她即大反應說：「做咩？你以為我有登革熱？我冇畀蚊咬，你都唔關心我，只係喺社交網問候吓，好似普通朋友咁。」Lisa即以「神經病」回應家姐。