養夫千日 用在剝蝦？大S撒嬌老婆最識撈

大S嘅代表作，係「杉菜」同「汪小菲」：喺偶像劇《流星花園》飾演「杉菜」紅遍兩岸三地；閃嫁「我來自北京」嘅京城闊少汪小菲相夫教子。身為「正菜」嘅大S叫「杉菜」冇叫錯，所謂做人要識變通，真係托杉都要識得轉膊，「剝蝦論」擺明係畀足面，托晒汪小菲大腳，大腳趷起，捧到上天，爭啲去到人性光輝呀！

人夫切忌變透明！

大S簡直將「撒嬌女人最好命」演繹得淋漓盡致！撒嬌，唔係得把口，「你好叻！」、「點解嘅？」一味扮白癡詐無知。蝦，大S識剝，要老公剝，係想令對方時刻都有「分分鐘需要你」嘅感覺。不論男女，都最怕被當透明，當你冇到，睇你唔到，掂行掂過，英雄冇用，邊有癮？好似天王黎明首歌《愛比我重要》咁唱：「待我好 原來愛你比我重要 陪着你 才能叫我生命炫耀。」小情小趣，最彰顯到對方嘅重要性。我Nuts哥有次同一對名人夫婦食煲仔飯，淋豉油撈飯呢個動作係個老公做，佢仲笑咪咪話：「老婆唔識撈。」呢刻，我眼前見到嘅豉油變成蜜糖。咪以為佢係暗寸老婆「唔識撈」，查實係「識撈」！呢位太太四肢健全，健步如飛，頭腦發達，就算叻到識飛，都分分鐘需要你，老公先至最重要。

好多人話依家啲男人唔爭氣，幫女人拎手袋，甚至踎低綁鞋帶，肉酸同體貼雖然係一線之差，但每段關係都有自己嘅相處習慣，子非魚安知魚之樂？你話肉麻咩？佢當有趣咪得囉，起碼大家搵到個位互相欣賞，就係呢啲小情小趣，肯為對方付出，關係先會長久。

愛是盲目 鹽醃變嗒糖！

大S收放自如識走位，有時突擊：「有冇後悔娶我？」；有時製造驚喜，感動窩心。有次身在北京嘅汪小菲發住燒講：「老婆，我想食水餃。」大S由台北秒飛過去做一大盆水餃，可見佢並非公主癌乜都唔做、等飯開嘅金絲雀！你有情我有義，愛情係相向，由初時唔睇好，直到依家結婚8年，甜蜜如軟糖，好似大S煮紅豆牛奶，落糖變落鹽，汪小菲話：「鹽跟糖本來就分不出來。」都話愛情係盲目，係包容！做男人，唔使吓吓硬繃繃，時軟時硬，剛柔並重，不言不語也可以溫柔。

見老婆被圍剿，難怪汪小菲（聲火）過辣雞：「她為我生一對兒女，還去了一趟鬼門關，還不能讓老公幫她剝蝦？」冒住癲癇症發作，生完一個又一個，早排仲搞到小產，唔憂柴憂米嘅大S都搵命博，為乜？愛囉！感情冇對錯，只有珍惜同唔珍惜，正如大S事後話：「剝不剝蝦真的無所謂，只是小菲又知道了一個寵愛我的方式。」人生最幸福嘅時刻，無非就係知道自己被需要，被在意。

Nuts哥