網民咒心穎馬國明分手 岑杏賢畀Like！
黃心穎與落選港姐工藤佑采的罵戰尚未回氣，昨日同事岑杏賢竟對網上一則「祝福你同馬國明分手」的留言「畀Like」，可謂腹背受敵！另外，對於工藤佑采的黑面成為焦點，鄭嘉穎前晚出席活動時自認黑面始祖。
工藤佑采早前被指選港姐當晚黑面Hea跳，引來負評，師姐黃心穎公開批評她態度差後，她竟在網上「爆Seed」開火反擊，掀起罵戰。豈料一波未平一波又起，日前心穎在社交網上載日落靚相，有網民在下方留言：「祝福你同馬國明分手，祝福」，其後有網民留意到港姐岑杏賢竟讚好該留言，即引起一輪熱議。雖然事後岑杏賢的讚好已被取消，但被一位以工藤佑采照片做頭像的用戶截圖。該戶口更留言：「『祝福你同馬國明分手』留言，岑杏賢Jennifer都按Like，好嘢。證明TVB同事都想你哋散，你不信可以睇吓，個留言已經有一百多個人讚，你形象插水啦。」
打電話講「唔好意思」
記者聯絡岑杏賢，她說：「我真係錯手！唔小心撳咗一啲唔知咩嘅Post。有個網民同我講呢件事，我即刻打畀心穎同佢講唔好意思，好在本身同佢都好熟，佢都冇誤會呢件事，自己事後都Unlike番呢個Comment。」而問到心穎有關岑杏賢畀Like，她說：「我唔回應嘞！」至於工藤佑采提名人陳君宜，被問到該社交網戶口是否工藤開？她說：「冇回應！」
嘉穎：黑面黑得過我？
另外，藝人古天樂、張智霖、鄭嘉穎及鄧麗欣等前晚出席電影《L風暴》慶功宴，監製黃百鳴更帶同孫仔孫女到場。講到太太陳凱琳在港姐決賽做「最上鏡小姐」評判，問到嘉穎可有討論工藤佑采「黑面事件」？他自抽笑說：「黑面黑得過我？黑面我出名o架啦！仲有人黑過我？（但你出鏡上台唔黑面。）唔係o架喎！睇心情o架喎！有咩話出唔出鏡o架？黑就黑o架啦！」講到對方被指Hea跳，他不作回應，但有講勉勵說話：「做番自己性格唔係唔得，但要人哋清楚你，唔係一朝一夕，唔好周時變，一時黑面、一時又笑，要連貫番你個人先真實，好似我廿幾年都係咁，觀眾就接受咗。如果你要做呢樣嘢，就要承受番個後果，自己揀啦！」又笑言不會對太太黑面，因為是鍾意的人。而鄧麗欣早前與男友邱勝翊（王子）在尖沙咀拍拖，在車上頭貼頭，問到會否當街錫錫？她稱不會，又指二人出街習慣保持距離，即使公開戀情，都不會公然晒愛。